amla health benefits: నోటికి హితవు.. పోషకాలకు నెలవు!

By Chowdary

Updated : 11 December 2025 11:06 AM

ఇది ఉసిరికాయల సీజన్‌. వీటితో ఊరగాయ, రోటిపచ్చడి, పప్పు, రసం ఏది చేసినా వారెవా అనిపిస్తుంది. పుల్లపుల్లటి ఆమ్లాతో వంటలు రుచే కాదు ఆరోగ్యం కూడా. ఉసిరిలో ఎన్ని ఔషధ గుణాలున్నాయో చూడండి... ఎ, సి, ఇ విటమిన్లు, ఐరన్, క్యాల్షియం, సోడియం, పీచు, ప్రొటీన్లతో ఆమ్లా మంచి పోషకాహారం. చుండ్రు, వెంట్రుకలు చిట్లడం, రాలడం, పిన్న వయసులోనే జుట్టు తెల్లబడటం వంటి సమస్యలకు చెక్‌పెట్టినట్లవుతుంది. కుదుళ్లు గట్టిపడి కురులు ఒత్తుగా, నల్లగా ఉంటాయి. చర్మం పొడిబారదు, ముడతలు పడదు. ముఖానికి మెరుపు వస్తుంది. వయసు మీదపడినట్లవదు. కొలెస్ట్రాల్‌ స్థాయి, రక్తపోటు అదుపులో ఉంటాయి. గుండెజబ్బులు వచ్చే అవకాశం తగ్గుతుంది. మధుమేహం నియంత్రణలో ఉంటుంది. శరీరంలో చేరిన మలినాలు, వ్యర్థాలు తొలగుతాయి. వీటిలోని ఎ-విటమిన్‌ కంటిచూపును మెరుగుపరుస్తుంది. కాలేయం ఆరోగ్యంగా ఉంటుంది. సి-విటమిన్‌ అధికంగా ఉండటం వల్ల రోగనిరోధక శక్తి పెరుగుతుంది. జీర్ణ ప్రక్రియ సాఫీగా ఉంటుంది. మలబద్ధకం, కడుపుబ్బరం తగ్గుతాయి. ఎముకలు, దంతాలకు పటుత్వం వస్తుంది. యాంటీఆక్సిడెంట్లు అధికంగా ఉన్నందున జలుబు, జ్వరం వంటి వైరల్‌ ఇన్ఫెక్షన్లను, కొన్ని రకాల క్యాన్సర్లను నిరోధించినట్లవుతుంది. హాయిగా నిద్ర పడుతుంది. ఆమ్లాతో ముఖ్వాస్, మురబ్బా, జామ్, జ్యూస్, మిఠాయి, సబ్జీ, రైతా, కఢీ, క్యాండీ, ఫ్రైస్, ఖట్టా మీఠా, పులిహోర, చాక్లెట్లు, చాయ్‌.. ఇలా ఎన్నెన్నో వెరైటీలు చేయొచ్చు. ఒంట్లో నలతగా ఉన్నప్పుడు ఏవీ రుచించవు. అలాంటప్పుడు వేడి అన్నంలో కాస్తంత ఉసిరి కారం, నెయ్యి కలిపి తింటే నోటికి హితవుగానూ ఉంటుంది, అనారోగ్య లక్షణాలు మటుమాయమవుతాయి.